Вучоба на філалагічным факультэце БДУ (sep 1, 1954 – jul 1, 1959)

Description:

У Мінску многае было ўпершыню: упершыню ехаў у трамваі, упершыню апынуўся ў асяроддзі маладых, захопленых роднай мовай і літаратурай хлопцаў і дзяўчат, пасяліўся ў студэнцкім інтэрнаце... У аўдыторыю прыйшлі дасведчаныя, аўтарытэтныя выкладчыкі. Універсітэт адкрыў Р. Барадуліну новага, «нехрэстаматыйнага», вялікага Янку Купалу, яшчэ больш паланіў сэрца геній роднага слова М. Багдановіч. «Дзякуй за гэта Івану Навуменку, — з пашанай пісаў пазней паэт. — Дзякуй крыштальнаму сумленнем майстру Сяргею Дзяргаю за падтрымку, за прыязнасць, за таварыскасць».

У запісах першых гадоў вучобы выклікае сімпатыі асаблівая цяга маладога паэта як мага болей чытаць, часцей хадзіць у тэатр, кіно. Відавочна, што цягнула да насычэння культурай, мастацтвам. Хацелася ўвабраць у сябе ўвесь свет. 21 верасня — запісы пра абмеркаванне вершаў пачынаючых паэтаў на трохдзённай нарадзе маладых пісьменнікаў рэспублікі.

Ён, як і многія студэнты-камсамольцы, тры гады працаваў на цаліне. Студэнцкая моладзь жыла адной вялікай, вясёлай сям’ёй. Беларускія хлопцы і дзяўчаты апынуліся ў нязвыклых бяскрайніх прасторах казахстанскага стэпу, дзе ад селішча да селішча было па 20—30 кіламетраў, а наўкол толькі пшаніца і неба. Маладыя рамантыкі сутыкнуліся там з цяжкасцямі, неўладкаваным бытам, але ўсведамленне патрэбнасці і вялікага сэнсу сваёй працы па асваенні стэпу дадавала сілы і працоўнага натхнення. Гэтымі думкамі і пачуццямі былі прасякнуты «цалінныя» вершы. Нізка вершаў «На зямлі цаліннай» адзначана ў 1957 годзе сярэбраным медалём VI Сусветнага фестывалю моладзі і студэнтаў.

Added to timeline:

Date:

Images: